Un día de caza (INFANTIL E XUVENIL - SOPA DE LIBROS - As aventuras de Nunavut)

Reseña del editor


Nunavut, a nena protagonista das aventuras desta nova colección infantil de Xerais, escrita por Xoán Abeleira e ilustrada por Jacobo Fernández Serrano, pertence a un dos pobos máis lendarios da terrra, os innuit ou esquimós, pobo primitivo que aínda sobrevive en durísimas condicións, ocupando a rexión máis fría do noso planeta, a do Círculo Polar Ártico, que se estende dende Alasca a Grenlandia. Alí os esquimós viviron en paz, illados completamente do resto do mundo, ata que, a mediados do século XIX, na época das grandes exploracións, entraron en contacto cos europeos. Actualmente, as diversas tribos innuit seguen a loitar por defenderen os seus eidos, as súas culturas e as súas linguas: o modo ancestral de vida da que foron afastados. Pero Nunavut tamén é hoxe unha fermosa e esperanzadora rexión autónoma para tódalas comunidades árticas. O obxectivo desta nova serie de Xerais, As aventuras de Nunavut, é que os lectores e lectoras novos poidan descubrir as marabillas dunha cultura que, por fortuna, aínda nos pode ensinar moito. Transcorridos dez anos dende a súa nacencia, en Un día de caza, Nunavut, impulsada pola arela de paliar a escaseza de comida que sofre a súa aldea, vese envolta nunha aventura con traza de soño na que coñece a unha simpática balea en apuros e a un enigmático xerifalte, que a axudarán a acadar o seu propósito.


Biografía del autor


Xoán Abeleira, fillo de emigrantes galegos, nace en Maracay, Venezuela, en 1963. Aos dez anos instálase coa súa familia en Madrid, onde cursa diversos estudos e se inicia como poeta, narrador, tradutor, xornalista, músico, guionista e director teatral. En 1999, decidido a comprometerse ética e profesionalmente coa lingua e mais a cultura dos seus, trasládase a Galicia. Desde entón publicou en galego dous poemarios (Animais Animais e As nosas sombras no Xardín de Serralves), un ensaio lírico e fotográfico verbo do artista Manfred Gnädinger (A pegada de Man, Xerais 2006 ), os catro primeiros volumes da serie para nenos As aventuras de Nunavut (Xerais, 2003) , dúas traducións (Porca terra, de John Berger, e O viaxeiro astral, de Jack London) e un cento de artigos e colaboracións nos xornais El País, La Opinión de A Coruña e Galicia Hoxe. Arestora coordina o proxecto multidisciplinar Fuso Negro e participa nas accións do Grupo Surrealista Galego.

Jacobo Fernández Serrano (Vigo 1971) é licenciado en Belas Artes na especialidade de pintura pola Universidade Complutense. Ilustrador, pintor, debuxante e comiqueiro, como autor de literatura infantil publicou na colección Merlín de Xerais os libros " A gardería de dona Bixelmina " (2005), " A pedra e as formigas " (2006), " Mil cousas poden pasar. Libro I " (2009), premio Merlín de literatura infantil e " Mil cousas poden pasar. Libro 2 " (2011). Iniciouse na ilustración de libros de literatura infantil en Xerais con " As aventuras de Nunavut " de Xoán Abeleira, serie da que publicou catro libros: " O nacemento de Nunavut " (2003), " Un día de caza " (2003), " Sedna, a deusa do mar " (2004) e " O caribú namorado " (2005); ao que seguriron outros traballos para diversas editoriais. Ademais de traballos de ilustración de libros de texto, dicionarios, guías de natureza, carteis ou ilustracións para televisión, etc. É, tamén, autor da serie de banda deseñada " Os amigos de Archimboldo Roque " , publicada na revista " Golfiño " (2000 a 2004) e recollida no volume homónimo publicado por Faktoría K (2008). Tras realizar este personaxe converteuse en colaborador da publicación periódica " Dos Veces Breve " , así como da segunda época da revista " BD Banda " , na que desenvolve a serie titulada " Animais pantasma " . Co álbum de cómic " Aventuras de Cacauequi " (2007), obtivo o premio Castelao da Deputación da Coruña de Banda Deseñada, e a nominación ao Premio Expocómic 2008 de Madrid e do Salón do Cómic de Barcelona, no apartado de autor español revelación. É autor da serie de cómic para os primeiros lectores " Marcopola